الكريسماس و اللامؤاخذه الهري السنوي

أهلاً أهلاً بالعيد بالعيد

اهلاً اهلاً بالعيد .... مرحب مرحب العيد... صفاء أبو السعود

كل سنة و انتم طيبين، رأس السنة و الكريسماس، احتفلنا أكيد كلنا بالكريسماس كارولز الكتيرة اوي و انبسطنا و هيصنا و لبسنا طراطير حمرا و زوقنا الشجرة و اشترينا بابا نويل و اتصورنا صور سيلفي و عملنا شك إن و كده بقى ..... إلخ، الانبساط حلو مفيش كلام، ربنا مش عايزنا نكون ناس كئيبه و خصوصاً اننا داخلين سنة جديدة، و الموسيقى و الغناء فن، و الترتيل صلاة طبعاً،  الفن حلو مفيش كلام، فيه فيلسوف مسيحي اسمه بيتر كريفت قال  "الله محبة، و الموسيقى لغة المحبة، فالموسيقى إذاً لغة الله"، بس احنا بنحتفل بايه اصلاً؟؟ هو احنا لو قلنا كلمة كريسماس اول حاجة حتيجي في مخك ايه؟؟؟

كل الي يسوع بيحبهم شمال!!!

لو لم يتجسد الله... لما تأله الأنسان... القديس أثناسيوس

التجسد هو الوسيلة الوحيدة لتحقيق إنسانية الإنسان...الأب رامي إلياس اليسوعي

 لأن الابن أراد أن يُرسل و أن يُلقب بابن الانسان حتى يجعلنا أبناءً لله، لقد تنازل لكي يرفع الذين سقطوا، لقد جُرح لكي يُعالج جروحنا، لقد خدم لكي يحرر هؤلاء الخدام إلى الحرية، لقد خضع للموت حتى يحتفظ بالخلود للأموات...القديس كبريانوس

طبعاً كلنا اتهرينا الكلام التالي : "المسيح بيحبنا و اتجسد عشان بيحبنا و .... إلخ"، بس احنا جتتنا نحست و زهنا و بقى بالنسبة لينا هري، اصل المشكلة اننا بنبص على الموضوع من النهاية، يعني ايه؟؟ يعني بنبص على الحدث بعد لما فهمنا ايه اللي حصل، خلونا نفكر قبل الحدث ما يحدث، يعني تخيلوا اننا يهود و المسيح لسه مولود حالاً، اليهود كانوا مستنيين "المسيح" او ببساطة ملك أو نبي أو ممكن نقول بالبلدي كده "البرنس بتاع الأنبياء" لكن مخطرش في ذهنهم خالص أن المسيح اللي هما مستنينه كان الله المتجسد،

مفيش حاجة في اليهودية بتقول ان الله اللي هو في  جنب و كل الخلائق  في الجنب التاني تيجسد و يبقى "واحد مننا"، الأب روماني جوارديني بيقول "بوجود يسوع، لم تتحول فكرتنا عن الإنسان وحسب، بل تحولت أيضاً معها فكرتنا عن الله" ، المسيحية بتقول ان الله خالق الكون و اللي هو غير محدود بقى محدود، اللي يعرف كل فتفوته بقى فعلاً فيه حجات مش عارفها، اللي بيشبع الخليقة بقى جعان و عطشان و تعبان، اللي بيقدر على كل حاجة بقي محتاج حد يشيل معاه الصليب، اللي بيسمع صلوات الناس اختبر صمت الله الآب، ليه عمل كده؟!! عشان إله المسيحية إله جدع، أب في انه مسئول بجد تجاهنا، ام في حنيته لينا، اخ و صديق في انه ايديه اتوسخت في التراب بتاعنا، رقيق في انه بيسكن فينا برقه بروحه و محترم مش بيتدخل و بيقحم نفسه في حياتك، الموضوع مش مزود و بقر و مجوس، الموضوع "إخلاء" (فيلبي 2:6-11)، او باليوناني "إفراغ"،  كلمة افراغ ديه في اليوناني عميقة جداً فيه مجلدات عن الكلمة ديه لوحدها!!، يسوع لما اتجسد عمل زي الأم لما بتبقى حامل!!، المسيح حمل طبيعتنا الميته و شالنا جواه زي الأم لما بتشيل ابنها جواها، اتحد بينا من الداخل عشان بنقينا، ينقي الفكر و الإرادة و الشخصية و المشاعر و الرغبات و الطموحات و  لما يولدنا في الكنيسة بالروح القدس يولدنا ابناء حقيقيين، احنا كنا جنين غير مكتمل "سقط" لكن المسيح حملنا على الصليب و في القيامة و في الصعود صعد بطبيعتنا عشان يدينا رفعة و مجد منستحقاش، ليه اتجسد؟؟ عشان الهنا مش قاعد فوق في التكيف مع الملايكة و عمال ياكل فشار و هو بيتفرج فوق، الهنا اديه اتوسخت و شالنا، الأب رامي إلياس بيقول " تألم المسيح و مات على الصليب حباً لنا. لم يعش آلامه من باب تنفيذ برنامج مُسبق، كما نعتقد، و هو لم يتألم مكاننا، بل تألم المسيح لأنه يحبنا فأراد أن يعيش كل ما نعيشه، بما فيه الألم. أراد أن يعيش كل ما يعيشه الإنسان إنساناً. لم يبحث المسيح عن الصليب. بل قبله لأنه يحب، يحب الإنسان حتى الموت"، الهنا بيسكن في جسدنا اللي هريناه جنس و مخدرات و كره و غل .. إلخ،  المسيح هو الله بالحقيقة خلانا اولاد لله الآب النعمه، يعني احنا كنا ولاد غير شرعيين وبقينا ولاد شرعيين، بقيت البشرية كلها ولاده، الستات و الرجالة اللي شغالين في الدعارة دولة بناته و ولاده و المثليين بقم اولادة و بناته، و الحرامية و قتالين القتله و شمامين المخدرات و المسيحيين و الملحدين و أنا و انتم و كل واحد في كوكو الأرض  بقينا أولاده و بناته، الموضوع مش سهل، زي ما قلت في اول النوت مينفعش نقرأ الحدث بعيونا دلوقتي في العصر الحديث اللي بيتكلم عن الآخر و قبول الغير و كده، لأ، فكر في الموضوع كده، تخيل أن فيه قسيس قاعد مع البنات اللي من وجهة نظرنا شمال، أو مع جماعة من المثليين (اللي بيتقبض عليهم اليومين دولة في مجتمعك و بيتشهر بيهم في الاعلام)، حتقول عليه ايه؟؟، عارف ليه اتجسد؟ عشان هو بيلتزم بعهده مع البشريه أنه يكون أبوهم حتى لو كانوا السبب، حتى لو شوهوا صورته فيهم ، فيه فيلسوف قال "من قال لأحد: "أحبك"، قصد" لن  تموت"، الله بيقولنا لن تموتوا، انا باقي عليكم، المبادرة منه، الله مد ايديه الاثنين لينا (المسيح و الروح القدس عند القديس ايرناؤس هما يدا الله) لينا و احنا غرزنا سكينه في الأولى و بنسكت الثانية، لكن الله مادد ايديه بالدواء، ايد بتدي الروح عشان نبقى هيكل زي هيكل سليمان، و ايد تانية بتدي المسيح الكامل و نبقى متحدين بالله الكلمة المتجسد

هو حياته [يسوع] على أنها تجسيد لقبول شامل غير مقيدٍ بحصريةٍ اجتماعية أو طقسية أو عرقية (المرأة، السامري، الأبرص، المتآمر، الجانح جنسياً، الجندي الروماني، جميعهم ينالون بيسوع نعمة و صداقة)...الأسقف روان وليامس

بيسوع المسيح نُحِب و نُحَب. ليس لما نستطيع أن ننجزه بل فقط لكوننا ما نحن عليه. الحب هدية غير مشوطه بعيداً عن أي اعتبار لأي عاهة أو لأي إمكانات موجودة لدى الشخص المحبوب. و علينا أن نتذكر أيضاً أن المسيح آتى من أجل المعطوبين و المُشوهين و السقماء بالروح ...الأب جون بريك

 هو ميلاد و لا مولد؟؟؟!!

لقد وقعنا في الفخ... عادل امام فيلم مرجان احمد مرجان

الفخ اللي احنا وقعنا فيه و بنقع فيه اننا حطينا الله على طرف الدايرة و احنا  و الحجات اللي بنعملها في المركز، مع ان الله عمل العكس، الله وضعنا و احنا منستاهلش في المركز، كسر المنطق، شقلب المعايير، كسر الموت، فرتك العدو، بس احنا لسه نايمين في العسل و مش ناويين نقوم، الحفلات مش وحشة و مش حرام و الفن مش حرام و الضحك مش "عيب و حرام"، الأب ولفريد هارينجتون في كتابه "يسوع أخونا" بيذكر امثله كثيرمن يسوع ممكن جداً انها تكون ضحكت اللي بيسمعوا يسوع، مثلاً زي المثل بتاع الراجل اللي بيبني بيته على الرمل، الناس كانت شايفه ان اكيد مفيش حد عاقل يبني بيته على الرمل، و يسوع برضو اكيد ضحك مثلاً في موقف مرثا لما كانت عماله تشتكي مريم، يعني بالبلدي المسيح مش كئيب و لا عايزنا نكون ناس كئيبة حزينة، المشكله مش في الفرح المشكلة اننا خلينا مركز العيد لبس نشتريه و ناس نعزمهم و شجرة نزينا و نظبط أكل و شرب و خروجه نخرجها ليله العيد و.... إلخ، مبنتكلمش على عمل الله معانا كبشرية ميته، مش بنتكلم عن الشجرة الحقيقية اللي علق عليها عنقود الحياة (الصليب)، ازاي يعدي الحدث ده بالسهوله ديه علينا !! الفخ اللي احنا وقعنا فيه اننا حولنا الميلاد او سر التجسد الإلهي إلى "مولد" ميلاد ابن الله المفروض يخلينا نخرج شويه من نفسنا و يغيرنا من أفراد متمركزين حولين نفسهم إلى كنيسة واحدة تقدم المسيح للخليقة كلها.

لاهوت العز و أكل الوز

إثبات وجود الله لأنه نافع و إنكاره لعدم جدواه نقيضان يتساويان في الخساسة...الأب فرانسوا فاريون اليسوعي 

طبعاً مع قدوم العام الجديد تظهر الافتاءات و الهري بتاع اطلب و ربنا يحققلك و تتجلى هذه الفكرة في قداس 31-12-2013 لما كلنا بنفرش فرشة الطلبات (عربية-شقه-زواج-عيال.... إلخ)، و كأن الله هو الواد بتاع الديليفري بتاع "اولاد رجب"، اللي لما يجيب حاجة غلط نشتمة!!، الله بيتدخل في حياتنا ده أكيد، لكن بيدخل على مستوى "سري" بالبلدي "داخلي" مش انك تحس ان عندك فلوس و عربيه و عيال و احفاد، لأ طبعاً ده البقشيش بتاع ربنا الله، بص لنور ربنا في حياتك، بص لدعوة الله ليك و بص لعمله داخلك، بص جواك مش حواليك، بلاش عشان خطري تفضل تهري و تقولي ربنا معاك عشان بعتلك فلوس أو عيل أو ترقية في الشغل و هو ده بس يبقي اللي أنت شايفة من عمل ربنا في حياتك، ربنا مش بنك و لا مستشفى و لا دكتور نساء .. ربنا شخص، تخيل لو بتحب زوجتك او زوجك عشان عينه/ عينيها بس (يعني بالبلدي بتحبها/ بتحبيه عشان عينيها/ عينيه مش بتحبي فيه عنيه/ عينيها)، تخيل مشاعرة/ مشاعرها، ربنا مخه كبير بس بلاش نعيش احنا في هري و نخلى العلاقة نفعيه بالطريقة ديه، الميلاد ده عقد زواج بين الله و البشرية، لو انت عاوز الله "في السراء و الضراء" براحتك، و الله هو الطرف اللي عرض نفسه للطرف التاني، و الله بيحترم كل يوم "لا" مننا، بس هو اعطانا كل حاجة، اعطانا ذاته ناكلها، احنا بناخذ القبلة من المسيح، بناخذ الدواء، للأسف احنا متمركزين حولين نفسنا اويييي، مش شايفين ان فيه ناس في البشريه غيرنا، نحن مركز الأرض لا الخليقة لا الكون، نحن مركز المجموعة الشمسية !! احنا مش شايفين ان عندنا اخوتنا متألمين و مفيش حد بيذكرهم و مفيش اجمل من ديه مناسبه عشان نذكرهم، فيه ناس بتتولد زي يسوع في الشارع بس للأسف الدنيا بيتقودها لمسار حياة غير مسار يسوع، ممكن يشتغلوا في الدعارة ممكن يعيشوا حياة فيها مثلية جنسية ممكن حياتهم تكون في المخدرات، فيه مليون نهايه مأساوية بس احنا مش بنفتكرهم أو بننساهم عشان ميفصلوش علينا فرحة العيد، ممكن فيه كذا انسان في 7 يتاير يكون مش لاقي أب أو أمه أو زوحه أو زوجته أو ابنه أو بنت أو بيشتغل شغلانه شمال أو عمل جريمة أو اتعملت تجاهه جريمه، فيه 7  بليون انسان في كوكو الأرض غيرنا، ياريت نذكرهم

من هو يسوع ؟؟

من هو يسوع المسيح بالنسبة لنا اليوم...ديتريتش بنهوفر

فيه واحد برنس فعلاً اسمه دتريتش بنهوفر سأل سؤال زمان و مازال سؤاله ده مهم، مين هو يسوع المسيح بالنسبة ليك أنهاردة، ممكن تسمعلي قانون ايمان و تقولي "واحد مع الآب في الجوهر ......" بس انا عاوزك انت تفكر مين يسوع بالنسبة ليك انهاردة؟ اشمعني يسوع؟ ده دورك انت،  انا مش حأكلك الجواب بالمعلقة، بس خليك شجاع و جاوب على السؤال، دور عليه في العيد ممكن يمون يسوع هو قريبك البايخ اللي بيرخم عليك بكلمه و انتم عاقدين بتاكلوا في العيد  و بيقولك انت ليه مخلصتش جامعتك لغايه دلوقتي ليه!!! يسوع هو خالتك اللي بتضايقك كل لما تشوفك و تقولك ان ليه متجوزتيش لغاية دلوقتي ليه!! يسوع موجود في كل انسان، احنا في الكنيسة بتاعتنا بنقول تعبير موجود عند كل المسيحيين و هو بيرجع للقديس كيرلس الكبير "و هو "أخذ الذي لنا و أعطانا الذي له"، هو اخذ انسانيتنا، و بقي في كل واحد في البشريه، و اعطى لكل واحد في البشرية بنوة لله الآب، دور على يسوع العيد ده، كفايه هري، دور عليه، الموضوع يستاهل

فما أصعب أن نرى في مجرم داخل السجن وجه الله كضحية؟ إنه لأسهل لنا أن نرى في طبقة أخرى من الناس الذين يتعرضون باستمرار للعنف الاجتماعي، و المرضى عقلياً، و الذين لا نزال نعاملهم على أنهم أعداء المجتمع و شعب متهم بتهديد نظامنا و إفساده. المسيح كمجرم، المسيح كمجنون، المسيح كسكير متشرد، هذه كلها و غيرها تدخل في تماهي [امتزاج أو اتحاد] الله غير المشروط بالضحية ... الأسقف روان وليامس

من الهين أن نرى المسيح ظاهراً على وجه بشوش، على وجه مضياف، و لكن ليس من السهل علينا أن نراه موحداً مع انسان لا نوده و لا ننجذب إليه، ساكناً فيه، و لكن ما تدعونا إليه الكنيسة هو هذا بالظبط: أن نسعى إلى المسيح ليس فقط في أصدقائنا، و لكن بنوع خاص في اولئك الذين لا نصادق ...كاتب مش عارف اسمه

دور على يسوع، شوف هو مين بالنسبة ليك في العيد ده، بس فتح عينك، "من له اذنان للسمع فليسمع"،فكر شويه هو مين بالنسبة ليك في لمناسبة دية، كفاية الهري اللي في حياتك ، شوف هو مين بالنسبة ليك لنهاردة

27-12-2014

عماد عاطف