بسكوت توتكو هل يحل أكله في الصيام؟

ذات مومنت لما تلاقي امك بتقولك "واد يا عماد، انت يا واد يا موكوس، قولي هتاكل ايه الاسبوع ده عشان الصيام الكبير بعد اسبوع

u feel like

"و لا أي اندهاش راحت عليك يا صيام"

تعريف الصيام القبطي

"هو فتره من الأيام تتراوح بين صيام "نونو" =40 يوم"،صيام"كبير = 55 يوم" او صيامات مختلفة:اربع و جمعه و عذرا و رسل... إلخ، هذه الفتره يتناول الاقباط الفول و الطعمية و الصوابع و ال"بابا"... إلخ و يطلبوا في الشغل "أكل صيامي" من "الشبراوي" أو من عربية الفول اللي تحت الشغل في الغالب بيبقى اسمها "الشيخ"، و تلاقي في اول الصيام الاهالي بتكلم بعض و تلاقيهم بيقولوا "كل سنه و انتم طيبين و بركة الصيام تكون معانا و الأخوان يغوروا في ستين داهية" ، و طبعاً مننساش ان يوم الاحد فيه حد لازم يوزع قربانه على الناس كلها و طبعاً لما تدخل السوبر ماركت او بنروح اي كشك لازم تلاقي "الكائن القبطي الصائم" بيبص في ظهر غلاف البسكوت احسن يكون فيه شرش لبن او مُصنع على خط قط صُنع عليه قبلاً منتجات اللبان أو قد يحتوي على آثار من مشتق الحليب !!!، و في آخر الصيام الناس بيجلها حالة ملل و بيقفشوا من الصيام و بيقولوا "و "القولون" بيبوظ خالص و بيستنوا الفطار بفارغ الصبر، قائلين هاتولي لحمة" و بيبدأ العيد ،و الصيام ده "حمادة" و العيد ده حماده تاني خالص، (انظراللينك رقم1) و لكن السؤال المهم احنا ليه بنصوم؟؟؟؟ "انا مبسوط ان انا سألت السؤال ده" (ايموشن حازم صلاح) هناك اجايات مختلفه غالباً هي إجابات من وعظات بتدافع عن الصوم او من كتيبات و فعلا اجابات مدهشة "أكثر منفريسكا" و هي

عشان ناخد بركة الصيام 

عشان منفصلش نفسنا عن الكنيسة 

عشان الاكل الفطاري مضر بالصحة و يسبب الوفاه و اللحمة بتجيب نقرص (ده على اعتبار ان احنا لاقيين اللحمة، و في النقطة ديه بالذات استعين بالقول المأثور "هوا فين اللحمة" ايموشن عصام العريان 

عشان اللي مبيصومش مش بيتناول 

عشان الناس متقولش عليا مش صايم 

عشان البروسطانط بس هما اللي مش بيصوم 

عشان عادة و على رأي المثل "تغيير العوايد فال"ايموشن خالتي بامبة 

كنت بفكر في رد الفنانة سعاد حسني "كلكم ساقطين..." و لكن لم اجد "ايموشن" يعبر فيه عن غيظي غير ايموشن البرنس عمرو اديب"عايز ارجع"،"الفنانة صباح لما فؤاد المهندس كان عايز ياكل اكل كتير في رمضان قاله له"يا عالم فهموه "رمضان=الصيام" عمره ما كان كداا

اسئله كثيره بتتقال في موضوع الصيام، ناكل ايه؟ و ناكل امتى؟ و الصيام طلع امتى؟، تختلف الاجابات بتوجه كل واحد واحد شايف الصيام من الازل من ايام آدم!!!! و التاني شايف الصيام الكنيسة اخترعته اول امبارح!!!!!!، لكن كلا الموقفين "شمال" و بيخلوني عايز ارجع بجد ،عايز تصوم خلى في مخك المعلومات التاليه

الاكل الصيامي ليس اكثر طهراً من الفطاري ربنا قال لبطرس ما حلله الله لا يحرمه انسان 

البركه مش بتتاخذ البركه بتتعمل، البركة الحقيقية هي ان تكون صورة ليسوع المسيح ، أن تحب غيرك حتى الموت 

فاكس كل الناس لو مش عايز تصوم متصومش ، متعملش حاجة مش مقتنع بيها، لو شايف الصيام عادة متصومش، تغيير العوايد حاجة جميلة 

الكنيسة هيا البني آديمين مش الطقوس و لا المباني ، انت بتفصل نفسك عن الكنيسة "البني آدميين" لما بتتكلم عليه، لما بتصلبه بنميمتك، بتجرحة بحربة لما بتدينه، بتكرهه في المسيح لما بتقول "حماده" و تعمل "حماده تاني خالص" 

موضوع اللي مش صايم ميتناولش ده كارثة، انت اصلاً في اشد مراحل "قداستك" لا تستحق جسد و دم ابن الله، ده انت لو "اتشقلبت" لا تستحق ان تقترب من جسد و دم المسيح، انت اصلاً بتأخذه مجاناً او بتعبير مسيحي "نعمة"،الافخارستيا هي "الدواء"كما قال اغناطيوس الانطاكي (50م-117م)، يعني بالبلدي انت عيان و متستاهلش و محتاج الدواء 

البروسطانت بيصوموا "انقطاعي" "، اما موضوع "طقسهم= نظامهم" في مواعيد الصيام و نوعية الأكل فهو خاص بكل كنيسة و بلاش نتكلم على "البسبوسة الصيامي" و الجبنة الصيامي" و المحشي الصيامي" اللي بيتباع في الكنيسة، خليك في حالك، كل جماعة سواء مسيحية او غير مسيحية تصوم حسب ترتيبها الخاص و ما تراه نافع لشعبها 

"بحس اني عاوز ارجع لما بسمع مسيحي متعصب بينتقد صيام المسلمين فقط لأنهم يأكلون أكل "فطاري" بعد الصيام و بكون نفسي اقوله " و انت مالك ،خليك في حالك" " ده طقسه و ترتيبة ،المهم انت لما بتصوم بتعمل ايه 

انت محتاج لدكتور، الدكتور هو المسيح ليس الصوم، الصوم وسيلة و ليس غايه 

عشان مرغيش كثير و الناس تمل فكر انت بتصوم ليه، انا من صغري اصوم كل الصيامات لكن في الواقع انا لا استفاد منها على الاطلاق، لو حسبت اخر سبع سنين من حياتي انا بصوم كل الصيامات الهامة = 55+40+15+15(الرسل)=125 يوم *7 سنين= 875 يوم يعني 2.3 سنه !!!!، للأسف مطلعتش منهم بأي حاجة، خالص، شوف انت طلعت بايه من السبع سنين اللي فاتو من الصيام، لو مطلعتش بحاجة اقف مع نفسك . عشان خطري الناس اللي بتحضر للعيال و الشباب، بلاش كل حاجة تلاقيها في "بستان الرهبان"، يا جماعة فيه حاجات روعه في بستان الرهبان و فيه حاجات ملهاش علاقه بينا على الاطلاق، ربنا مشك عاوزنا ننام على جماجم، ربنا عاوزنا نسأل عن "جماحم حوالينا و مش بنعبرهم " هم أهلك و اخواتك و صاحبك اللي واقف كل وقته على الكشك و اللي أدمن و اللي ملوش حد يعبره و صاحبتك اللي انحرفت و ناس تانيه كثير محتاجه، ناس عايشه و كأنها جماجم ، ارجوكم فيه قصص قولوها للشباب تفرق في حياتهم، "ابوس رجليكم" متكرهمش في الكنيسه ، فيه قصه تحفه في بستان الرهبان قولوها ليهم وبلاش قصص الرهبان اللي صاموا ترليون سنه و الرهبان اللي ماشافوش وجه انسان لقروون و الكلام ده بيعثرهم و بيحسوا ان طريق ربنا متعب و مقرف و مزيت!!!!، اقترح عليكم قصة موجودة في بستان الرهبان"ببساطة "راهب صغير راح لراهب قالة بقالي 30سنه مكلتش لحمه، قاله المهم لا تأكل لحم أخوك"(انظر اللينك رقم 2) ديه ببساطه تلمس حياتهم، مينموش على بعض في الشغل و يلا البلاوي اللي الواحد بيشوفها، فيه ناس كثير -انا منهم- مش بحب اشتغل مع مسيحييين متدينين او خدام لأن عندهم ازدواجية للمعايير

ما هو التوتكو، هو البسكوت الموجود بالصورة، بسكوت جميل جداً، بصراحة بحبة، كنت بأكله لمده سنه على انه صيامي قبل لما آخذ بالي من آخر جملة "قد يحتوي على آثارمن مشتق الحليب"فالجواب عن السؤال اللي هو عنوان النوت"هل يحل أكل التوتكو في الصيام؟" انا معرفش!!! انت قيم الموضوع بس ارجوك شغل دماغك و خليك واثق ان ربنا مش حيسيبك تتخبط شمال و يمين، بس بجد عشان خطري خليك انسان، خليك يسوع خلى صيامك ليه معني، بلاش يبقى مخدع صلاتك "حمادة" و المحك العملي "حمادة تانب"، خليك انت يسوعاً في صيامك، نوعيه الطعام ليست مشكله و لكن المشكله حين تضعها في وضعها الخاطئ تصبح كارثية، ضع كل شئ في حياتك في مكانه الصحيح كما فعل يسوع، و كما قال البابا بيندكت السادس عشر "ليس يسوع غريباً عن عن جوع البشر و لا عن احتياجاتهم الجسدية لكنه وضع هذه الأشياء في سياقها و ترتيبها الصحيح"

أخيراً قال المطران كاليستوس وير ... في يوم الدينونة الأخيرة لن اُسأل: كم كنت ناجحاً في ممارساتي النسكية، أو كم مرة سجدت في صلواتي، بل سوف أُسأل: هل أطعمت الجائع، و كسوت العريان، و زرت المريض و المسجون؟ هذا هو كل ما سوف أُسأل عنه 

لو عجبتك شير في الخير، لو معجبتكش قولي ليه

فيه تدوينه لمارك صموئيل فيها كلام جيد عن الصيام اقروها

http://divine-philosophy.blogspot.com/2011/04/blog-post_01.html

عماد عاطف

1-3-2013

تدوينه العيدhttp://www.facebook.com/notes/emad-atef/%D8%B9%D9%8A%D8%AF-%D8%A7%D9%84%D9%85%D9%8A%D9%84%D8%A7%D8%AF-%D9%88-%D8%A7%D9%84%D9%85%D8%B9%D8%A7%D9%86%D8%A7%D8%A9-%D8%A7%D9%84%D8%A5%D9%86%D8%B3%D8%A7%D9%86%D9%8A%D8%A9-%D9%88-%D8%B3%D8%B9%D8%A7%D8%AF-%D8%AD%D8%B3%D9%86%D9%8A/10152398494495335

https://www.youtube.com/watch?v=SfHWpkWuFgw