صيام العذراء بين القديس الأنبا بيشوي و مولد سيدي العريان

مدد يا عريان مدد ... فيلم أمير الظلام

كلنا شفنا فيلم "امير الظلام"، في مشهد لما عادل امام و شله "بكابورتا" :) بيستحموا في النافورة اللي في صلاح سالم و هدومهم بتتسرق و بعدين و هما راجعين وجدوا الراجل اللي ماشي مع مراته و قالهم "انتم بلابيص "، بعدين عادل امام قاله "ده مولد سيدي العريان" راح الراجل قلع البنطلون و بعدين بقوا جماعة كبيرة من الناس "البلابيص" اللي بيحتفلوا بمولد سيدي العريان، بيروحوا ليوسف داوود "زلفى" و الراجل اياه قال لعادل امام أنا "شامم البركة يا كفرة" :) !!!!!!!

https://www.youtube.com/watch?v=HfhN8s5VfV4

فيه نقتطين لازم تأخذ بالك منهم

واحد: انه قلع هدومه علطول لما عادل امام قاله ده مولد سيدي العريان

أثنين: الراجل اياه قال تعبير غريب، قاله انا شامم البركة

 مشهد القديس الأنبا بيشوي: لو ده جنان اتجنن

ببساطة، القصة اللي كلنا حافظينها و هارسينها 10000000 مرة، الانبا بيشوي شاف راجل عجوز و شاله و طلع المسيح! لكن للأسف القصة كده غلط، القصة الصح هي ، رهبان "قديسين" عرفوا ان المسيح ظهر، راحوا هوب رهوان عشان يشوفوا المسيح -حقهم انا لو مكانهم كنت عملت كده كنت ذهبت لأجد المسيح -، في الطريق ظهر ليهم المسيح لكنهم لم يروه!!!، لقد ذهبوا للساحر بتاع المعجزات و ليس ليسوع المسيح ابن الله المصلوب، راحوا عشان "يأخذوا، يشموا، يشوفوا البركة"، لم يروا المسيح الذي قال لهم "كنت جوعاناً و عطشاناً و مسجوناً" لكن الانبا بيشوي رأي المسيح و ذهب إليه، طبعاً أكيد الرهبان "القديسين" قالوا "ايه المجنون ده هو ده وقت فقرا و مساكين"، لقد رأي ان في الرجل العجوز المتألم يسوع المسيح ابن الله و شاله على ظهره، لم يسعى "للظهور " و لم "يثبت هذا الظهور" للرهبان الذين يسعون ليسوع صانع العجائب لكنه لقد رأي المسيح و حمله!!!! لو كنت صحفياً كنت سألت الانبا بيشوي قائلاً "ألن تذهب لرؤية المسيح" كان قالي بالبلدي كده "انت اعمي يا ابني المسيح امامك، المسيح مش بتاع ظهورات و معجزات و إن كان يستطيع ذلك،لكن المسيح هو قبول المتألم و الشركة معا و حب الخطاه، حتى لو بقيه الناس شايفين ان ده جنان اتجنن"

المسيح بين "صيام" العذراء و "مولد" العذراء

طيب ايه علاقة القديس الانبا بيشوي و فيلم أمير الظلام بالموضوع؟؟ أنا اقولك (ايموشن دنيا سمير غانم)، هل كلنا في الصيام حنعمل شير لصور العذراء و نروح النهضة بس!!!!؟؟؟؟؟؟؟؟

فكروا معايا كده، العذراء شايله المسيح "الطفل الصغير اللي بيرضع" و الانبا بيشوي شايل المسيح "الراجل العجوز التعبان" و احنا بنعمل ايه نجري لو فيه ظهور، طيب لو فيه فقير، حنديله جنية :)

صيام العذراء هو تحدي لينا كلنا ، حنعمل ايه مع الانسان المتألم، المسيح لما كان على الصليب العذراء كانت متألمه، و على الأرجح انها قالت كلمات تشبه الموجودة بالاجبية "العالم يفرح لقبوله الخلاص وأما أحشائى فتلتهب عندما أنظر إلى صلبوتك، الذى أنت صابر عليه من أجل الكل يا ابنى وإلهى"، يجي السؤالى لو كنت هناك كنت حتعمل ايه للعذراء اللي بتبكي على ابنها، ممكن حد حماسي حبتين يقول حبوس يديها و اشكرها لأن ابنها قدم حياته لأجل حبه لينا و اخذها في بيتي زي القديس يوحنا، لكن الواقع غير كده ،كنا حنرصلها آيات أو نقولها أقوال آباء و نقولها انتى ليه مضايقة ده المسيح ادانا الخلاص !!!، صدقوني احنا بنعمل كده مع كل الناس التعبانه، نادراً ما ندرك هول الألم لذي يمر به من حولنا.في كارثة اننا امام من يتألم لا نتحرك نحوه، فقط نرشقة من بعيد بالآيات الجاهزة و أقوال الآباء الخارجة عن سياقها، مش بنحس بمن يتألم، لا نحتضنه، العذراء كانت متألمه و باكية من أجل ابنها المصلوب أمامها، ماذا سنفعل أمام من يُصلب أمامنا، أحياناً نظن أن الله يطالبنا ألا نتألم و كأننا آلات لا تحس مع أن الله يطالبنا أن نتألم و لكن ليس بلا رجاء

ايه اللي بنعمله مع العذراء تاني، نفس اللي الرجل عمله لما قاله مولد سيدي العريان!!!!!!!!!، نجري وراء ظهور أو معجزه ،ممكن نشخبط على صورها بالشمع و نكتب صلي من اجل فلان، -على اعتبار ان فيه أم بتنسي عيالها- أو ممكن في صيام العذراء نجيب بوكيهات ورد ب 100 جنية و لا نعطي مثل هذا المبلغ للفقير- على اعتبار ان الورد بيفرق مع العذراء مش الاهتمام بابنها الفقير-، ممكن نبوس الايقونة لكن احياناً لا ننظر بعمق إلى مريم العذراء أمنا أو لا نتشبه بها، او ممكن نحضر النهضة لكن نستغلس نجلس مع حد من اصحابنا أو عيلتنا متألم، لو الكلام على الأهل ممكن نقول انهم بيحضروا النهضة بدل لما يجلسوا مع عيالهم المتألمين بل من الممكن أن يدعوا عليهم ، صارخين قائلين "ربنا ياخدك......" !!!!، و لو احنا عندنا أهل ممكن نجري لأمنا العذراء و تفكس لطلب امك "لو كانت عايزه بجنيه عيش او بجنية فول او طعمية"، على اعتبار ان العذراء بتنبسط لما انت/ انتي تفكسوا لامكم،

و ممكن تلاقي العذراء بتقولك:ان كنت لا تحب امك التي تراها، فكيف لك ان تحب امك التي لا تراها

مريم هي أشبه الناس بالله ... الأب أوليفر برج اليسوعي

صيام العذراء هو دعوة للتشبة بوالدة الإلهة و هي "الأكثر شبهاً" مننا جميعاً بالله الاب اوليفر برج ، ليس "فقط تمجيدها، دعوه لكل متألم باحتضان أمه العذراء دعوة لكل أب أو أم أن يجلس أو تجلس تحت صليب ابنها أو بنتها و تتألم من أجلة أو أجلها و ألا تهزأ بمشاعرة أو مشاعرها، دعوة لكل ابن أن يحتضن أهله، دعوة لنا ألا نعبد المادة "الايقونة" و لكن أن نتعبد بالمادة (الاب سيرافيم البراموسي) اي نصلي مستخدمين الايقونة و ألا نقبل الايقونة و نجرى بعدها !!!، فدعونا نتوقف عن الزغاريت و بوكيهات الورد و الفلكلور الشعبي و دعونا نحتضن العذراء أو القديسين اجمعين كما نحتضن الصديق و الأخ و الأخت و الأم و الأب بل و الأخ الصغير، دعونا نتوقف عن المماراست الشعبوية و نبدأ بمعاملة القديسين بحب حقيقي و ليس كما نطلب من السوبر ماركت :واحد صحة ، واحد خطوبة ، واحد عيال،...... إلخ، دعونا نبدأ علاقة باخوتنا في الجسد الواحد

كل سنة و انتم طيبين

صلاة أمنا تكون معنا

بدء صيام العذراء

عماد عاطف

لو عجباك شير في الخير، لو مش عجباك قولي ليه

"و إذا لم تعمل الشير أعلم أن الشيطان قد منعك "ايموشن موتو بغيظكم