Monday, April 21, 2014

قيامة المسيح أم قيامة حزلقوم



يعني ايه المسيح قام؟ لو أنا جيت و سألتَك /سألتِك يعني ايه المسيح قام أو يعني ايه اللي انت بتكتبه على الفيس و رسايل الموبايل "اخرستوس انستي... اليسوس انستي" :) أو لو واحد "برفكت" في الانجليزي
Christ is risen
الجواب غالبا حيكون "ايه" (ايموشن احمد شفيق)، ا"نا مبسوط انك سألت السؤال ده.. بس ثانية واحدة اجيب الشاحن من اسكندرية" (ايموشن حازم صلاح)،"الدرانك ميكونش درايفينج" (ايموشن رئيس الجمهورية محمد مرسي)، اللي انا متأكد منه أن معنى قيامة المسيح غايب عننا و غايب عني أنا شخصياً ، "ابسولوتلي" ايموشن الليمبي

المسيح أساساً مجاش عشان نحتفل بيه و نعمله عيد ميلاده و ختانة و قيامته!!!، المسيح جه عشانك انت و انتي، جه في عمق معناتك و أتعابك، المسيح عيلته افتكرته مجنون زيك تمام لما عيلتك بيتريقوا عليك لما بتعمل حاجة بتحبها، المسيح صاحبه و بلغه اليومين دول "واحد من اناتيمه" خانه زي ما كلنا اصحابنا بيخونونا وبيجرحونا، موقفش جنبه غير الستات و بالبلدي "النسوان" و الرجاله تركوه و واحد منه سب و لعن و التاني هرب عريان ،حياته كانت قبول بدون شروط، قبل المرأة الزانية (البنت الشمال اللي انت تعرفها) و الراجل العشار(الراجل اللي انت دفعتله رشوة و شايفه انه وحش و حيخش النار)، قبل العيال اللي كل الناس بتتريق عليهم، حياته هي تجسيد لقبول شامل غير مقيدٍ بحصريةٍ اجتماعية أو طقسية أو عرقية: المرأة، السامري، الأبرص، المتآمر، الجانح جنسياً، الجندي الروماني، جميعهم ينالون بيسوع نعمة و صداقة (الأسقف روان ويليامز)، جيه عشان يعطي لحياتك معنى و هدف، مجاش عشان نحتفل و نزين الكنيسة و لبس عيد و ناكل بط و ديك رومي و فراج و بوفتيك، جه عشان تتعلم انك تتخلى عن ذاتك/كرامتك حبتين، فيلبي 2:5-9 كانت ترنيمة بتترنم في المحتمعات المسيحية القديمة بتتكلم عن المسيح بكونه "الذي كان في صورة الله...... آخذاً صورة عبد""،لازم تتأكد أن المسيح الإله تنازل من أجلك و أخذ صورة العبد (انت لو حد في الحياة قالك كلمة جرحت كرامتك حتمحيه ، المسيح قبل إهانتنا ليه و مع ذلك تنازل لأجلنا) تنازل عشانك قوي
،المسيح جه في عمق معاناتك ، حاسس بيك، بيحبك زي ما انت كده عايزك تحبة زي ما هو مش عايزك تحبه أو تكرهه عشان مصلحة، عايز تبقى علاقتكم "غير نفعية"، يعني ممكن نستشهد بعبارة الأب فرانسوا فاريون اليسوعي لما قال "اثبات وجود الله لأنه نافع و إنكاره لعدم جدواه نقيضان يتساويان في الخساسة" يعني بالبلدي لو بتحب ربنا عشان مصلحة أو بتكرهة عشان مصلحة تبقى "واطي أنت يا ماو" (ايموشن خالد الصاوي في فيلم مطب صناعي)
يسوع مش عايزك تبقى تماف ايريني و لا ق. اثناسيوس عايزك انت، زبي ما انت، انا شخصياً شايفة انه بيحب عماد المعفن (ايموشن محمد سعد)، هو يسوعنا كلنا، انا و انت و كل واحد، يسوع المسيح لو انت ناسي بيحبك و بيحي القديسين و بيحب الأخوان المسلمين "اللي انت مسميهم خرفان" و محمد مرسي و عبد !!!!!!!!!!!!!!!!!!!!!!!!!!!!!!الله بدر و وجدي غنيم ...إلخ ، بيحبهم كلهم زي بعض 
ايه علاقة ده بالقيامة؟ "انا اقولك" (ايموشن دنيا سمير غانم في فيلم الكبير)، آخر حياة المسيح هي لحظات مأساوية، المسيح مضروب مجلود و باين للناس متروك من الله و فيه ناس قالت انه فاشل (مثل كلسس الفيلسوف الذي انتقد المسيحية في القرن 2)، "و مع انه في هذه الصورة إلا أنه ابرع جمالاً من بني البشر عشان حبة الغير مشروط فاق الوصف، (ملوش علاقة بصورة المسيح "الاجنبي" (ايموشن احمد مكي) اللي عينيه زرقا و شعرة اصفر و مكتوب تحتيها انت ابرع جمالاً)، و ده اللي انت بتقولة في اسبوع البصخة "لك القوة و المجد و العزة"، زي ما كلنا شايفين الأبرار ممكن يكونوا ظاهر قدامنا انهم متروكين من الله و الدنيا فاتحة درعاتها للأشرا، لكن حصل شئ غريب ،المسيح قام!!! ليه؟؟؟ عشان المسيح محبة، المحبة تكسر الموت (الأب فرانسوا فاريون)، المسيح الإله كان محبة و إخلاء، المحية أقوي من الموت و من أي عائق، المحبه جعلته يتنازل عن كرامته عشان عبيد آثمين، و يأخذ صورة مُذله و المحبة هي كسرت قيود الموت اللي هو أساساً كان عصيان و كره
عارفين احنا لو كنا زمان كنا صلبنا المسيح مش مرة لكن100 مرة!!!!، لأننا على استعداد اننا نضحي بأي حد عشان آماننا و سلامتنا و حياتنا، احنا في يوم قيامة المسيح، يعنى اليوم اللي فيه انتصر الحق و البراءة و النقاء و الحب على الموت، بنروح للهيلتون او الانتركونتيننتال بتاع سيتي ستارز أو 
Pub
مش مشكلة انك تخرج يوم العيد، لكن المشكلة اننا بنروح عشان ننسي، ننسى كام يسوع صلبناه بلساننا و سلوكنا و لسه تاركينه في القبر و حاطين مليون حارس عشان ميعرفش يهرب، لسه صالبين يسوع اللي في البيت (أهلك- شريك حياتك) او في الشغل او في الكنيسة او حتى اصحابك ، لكن هذا المصلوب لن يتركه الله، فحتى عندما تركه"اصدقاءه= التلاميذ "،لم يتركه الله، لأن يسوع كان طاقة من الخروج خارج الذات و قبول/ و تضحية غير مشروطين للآخر 
لو العيد حيبقى "بس" لبس عيد و انت مش بتفكر في المسيح عملك ايه و ليه، بلاش نسميه عيد قيامة المسيح خليه أسم تاني، سموه عيد الإله بس إله المسخره (ايموشن عادل امام) بلاش قيامةيسوع، قيامة يسوع ه (عشان الشرب و الرقص و الشغل العالي ه يا بوب)  ممكن عيد الإله حزلقوم (إله المشمش عند الفراعين -ايموشن احمد مكي)، سموه حلاوة بالقشطة، سموه العيد اللي طارت فيه بلونه للسماء بسي قيامة لكل واحد فينا ، قيامة ليك و للي للي حوليك، قيامة تبدأ من خلالك و تنتشر للي حولك،قيامة للي فاكر ان الدنيا لازم تمشي شمال، و فاكر ان "احبوا اعداءكم" وصية متنفعش في الزمن د ه،و فاكر ان الحياة بس اكل و شرب و ناسي من حولة، ناسي النالس اللي بيحبوة ، عمال يجرح اللي حولة منغير لما يحس، عمال يصلب و ، يجلد و يعري كل من حوله!!!
قيامة المسيح يعني "المحبة اقوى من الموت"... الأب فرانسوا فاريون 
ليه الصورة ديه؟؟

الصورة ديه تريقة في صحيفة كندية -على ما اظن- على الايمان المسيحي، الصورة أنا غرضي منها سؤال واحد، لو انت كنت رايح القبر و عارف ان المسيح حيقوم كنت حتاخد ايه، اقولك، كاميرا او موبايل، عشان تتصور معاه و تحطها على الفيس او ال "واتس أب 
Whats app
و تاخد "لايكات"
لو انت في عمق فكرك هو ده تفكيرك (انا شخصياً كدا) فكر تاني، ليه المسيح و عمل ايه، ادعوك تبدأ الرحلة
شوف المسيح عملك ايه، متخليش العيد يعدي عليك زي كل عيد، ارجوك خليه عيد مختلف، خليه قيامة ليك و للي حوليك، المسيح "أخذ الذ لنا و أعطانا الذي له"، خذ ما له (الروح القدس) و اخضع له و ابدأ رحلة القيامة مع المسيح و الصعود معه و لا يكون العيد لك "أفيون " و "هري" و "مخدرات"
لو عجبتك شير في الخير، لو مش عجباك قولي ليه
عماد عاطف
27/4/2013
سبت لعازر

4 comments:

  1. Wickedly inspirational Emad! I love it, keep it up!

    ReplyDelete
  2. ناس كتير متخيلة القيامة بس من الموت الجسدى
    لكن القيامة كمان قيامة من الخطية
    والاهم إنها قيامة من الغفلة اللى احنا عايشينها
    ..
    يهدها الغفلة
    إيموشن ابلة فاهيتا

    ReplyDelete
  3. عاجبني الكلام يا عمدة.. بس كانت محتاجة تبقي دسمة أكتر من كده... وياريت الهاي لايت اللي عالكلام ده تشيله عشان عيني وجعتني.. (ايموشن بيبربش ) :D

    ReplyDelete
  4. انا متفقة مع ماريان
    رأيي كمان بس نقلل التحابيش والايموشنز لأني ماعرفهاش كلها :D

    ال
    formatting
    ككل محتاج يتعدل عشان يسهل القراية

    على الناحية الايجابية، الفكر المقدم في التدوينة جميل جدا واساسي ومفصلي وكل حاجة

    استمر :)

    ReplyDelete