تعريف السيكو-سيكو
هي كلمة معظمنا كنا بنقولها و احنا صغيرين ايام البراءة و الطفولة و أحياناً لغاية دلوقتي، لما بنتكسف من حاجة نسميها "سيكو-سيكو"، في الغالب بيبقى قصدنا "الجنس" او أ حاجة متعلقه بيه ، هي بصراحة كلمة بتسهل علينا حجات كثير اوي هدف النوت تناقش موضوع من مواضيع "السيكو سيكو" هو موضوع الدورة الشهرية عند البنات/ الأحتلام عن الولاد و علاقتهم بالاسرار عموماً (تاتاااااا.. موسيقى تصويرية.... مارشات عسكرية (على رأي كاتب كتاب "الرجال من بولاء و النساء من أول فيصل) من وجهة نظر الكتاب المقدس و آباء الكنيسة و القوانين الكنسية و النفوخ اللي هو لامؤاخذه الدماغ
نبدأ بكلام التنين المجنح، الديناصور (على حد تعبير واحد صاحبي)، الكبير أوي، القديس اثناسيوس في رسالته للراهب آمون، من الآخر آمون ده راهب كان عنده مشكله و راح يسأل "زيينا يعني" الكبير القديس اثناسيوس، هل ينفع يا اثناسيوس اني اتناول لو انا احتلمت و طبعاً اكيد مش حيسأله على موضوع الدورة عند البنات لأن ده راهب و ديه مش اشكاليه من الاساس بس كلام القديس أثناسيوس عن الاختلام ينفع على الدورة الشهرية بنفس المنطق ؟! و ده رد أثاسيوس
"أخبرني يا صديقي المحبوب و التقي، ما هي الخطية أو الدنس في الإفرازات الطبيعية، كأن الإنسان مذنباً إذا نظف أنفه أو" تخلص من البصاق الذي في فمه؟ و يمكن أن نضيف إلى هذا الإفرازات الناتجة عن الطعام بعد الهضم في البطن....... فلا شئ نجساً إذاً فينا، لأننا نتدنس إذا أخطئنا، و الخطية هي النجاسة الحقة. و عندما تحدث إفرازات من الجسد بدون إرادة، فإن ما نختبره هوجانب ضروري تحتمه الطبيعة.....فما هي الخطية اخبرني من أجل الله أيها الشيخ المحبوب من الله، إذا كان السيد الذي صنع الجسد هو الذي شاء و خلق القنوات التي تفرز هذه الافرازات... التنين المجنح القديس اثناسيوس
النفوخ بيقول ايه؟
طبعاً اول سؤال بيجي في مخنا "الدين بيقول ايه؟"، خلينا الأول نقول النفوخ بيقول ايه، خلونا نفكر مع بعض من واقع كلام القديس اثناسيوس، واحد عرق عشان بيلعب كورة هل محتاج يتطهر؟!!! أكيد لأ، و ده الكلام اللي اثناسيوس قاله، خذ بالك انا مش بتكلم عن اثناسيوس كقديس و على انه بيقول "الدين بيقول ايه؟" لأ ، اثناسيوس كان منطقي جداً في كلامه، بيقولك هل انت محتاج تتطهر لو نظفت انفك (لامؤاخذه من البرابير) و كمان ربنا هو اللي خالق النظام ده (العرق، تنظيف الانف، الاحتلام، الدورة (اللامؤاخذه البيريود))، يعني ربنا هو اللي عامله و على رأي سعيد صالح "اعترضوا على كلام ربنا بقى"، كلام أثناسيوس كلام منطقي كلام يخش النفوخ و يعشش و يسلطنه، اعتقد ان اثناسيوس كراجل منطقى كان برنس جداً، و اعتقد ان داللي بنقوله في تفكيرنا، بس يجي السؤال الدين بيقول ايه؟؟
فلا يقدر كفن ميت على أن ينجس نفسا – ولا عظم ميت ولا قبر ولا شىء من الأكل ولا الإحتلام... الدسقولية: تعاليم الرسل
