عيد الميلاد والمعاناة الانسانية وسعاد حسني

تعريف عيد الميلاد 

"هو العيد الذي يذهب الأقباط إلى الكنائس المزينة و الجميلة جداً ، و يرتدون لبس العيد (البنات فساتين و الشباب بدل و احياناً بيلبسوا بروش بابا نويل و كوفيه حمرا و بيضا و الكلام العسول اللزوز ده ) و بعد قراءة الانجيل يذهب "معظم" الناس إلى المنزل ليتناولوا فته ولحمة و فراخ و يشغلوا التليفزيون على سي تي في، أغابي، ام اي سات أو حتى سات سبعة، و يبدأ الكبار ان ينتقدوا زي البنات "المُلفت اللي بيسبب عثرة لغير المسيحيين" و طبعاً الشباب يبدأ بالدفاع عن البنات و بعد ذلك يسمهوا الوعظة للبابا و يبدون أشد اعجاباً بالوعظة و يتناولوا النبيذ و يتناقشوا احياناُ في بعض الامور السياسية و ثاني يوم يذهب الشباب للخروجة بتاعة العيدبعد اليومين دولة كل حاجة بترجع زي ما كانت و على رأي المثل الشعبي "ترجع انسه ريما لعادتها القديمة" ، الخناق بيرجع بين الاهل و الصحاب و المخطوبين و المتزوجين و لو حد حاسس بفشل في الشغل (مثلي) يرجع حاسس بنفس الاحساس بس بشده، أصل "الأفيون" اللي اسمة عيد خلص، اصل العيد ده الواضح انه "هري" بنهري فيه عشان ننسى و نلاقي صوت حزنبل بيقول "اليوم خولص" و احنا نرد زي ما سعاد حسني ردت "طاب احكيلي حكاية البلبل" لكن حزنبل بيرد و يقول "اليوم خولص، هل العيد هو "هري" (ايموشن صديقي جون ادوارد) ام "افيون"(ايموشن صديقي مارك صموئيل) ام هو "فاكس التنين" (ايموشن بتاعي "عماد عاطف") ، هل هو هذه الاحتفالات ام عيد التجسد الإلهي هو شئ آخريأتي السؤال الجميل "طيب ايه المشكلة يا بوب؟" و أرد "أنا مبسوط انك سألت السؤال ده" (ايموشن حازم صلاح)، نرجع تاني من الاول، هو ايه لازمة التجسد من الأساس، و يأتي الرد إما "ايه؟" (ايموشن احمد شفيق) أو حد حيرد عليا من كتاب لاهوت نظامي و يحكيلي القصة من الأول "آدم غلط و اكل التفاحة.............إلخ، و ارد كما قالت الفنانة سعاد حسني "كلكوا ساقطين لم ينجح أحد إجابتكم غلط و عقولكم ظلط خيبتم خيبة كاملة لم ينجح أحد"

الكريسماس و اللامؤاخذه الهري السنوي

أهلاً أهلاً بالعيد بالعيد

اهلاً اهلاً بالعيد .... مرحب مرحب العيد... صفاء أبو السعود

كل سنة و انتم طيبين، رأس السنة و الكريسماس، احتفلنا أكيد كلنا بالكريسماس كارولز الكتيرة اوي و انبسطنا و هيصنا و لبسنا طراطير حمرا و زوقنا الشجرة و اشترينا بابا نويل و اتصورنا صور سيلفي و عملنا شك إن و كده بقى ..... إلخ، الانبساط حلو مفيش كلام، ربنا مش عايزنا نكون ناس كئيبه و خصوصاً اننا داخلين سنة جديدة، و الموسيقى و الغناء فن، و الترتيل صلاة طبعاً،  الفن حلو مفيش كلام، فيه فيلسوف مسيحي اسمه بيتر كريفت قال  "الله محبة، و الموسيقى لغة المحبة، فالموسيقى إذاً لغة الله"، بس احنا بنحتفل بايه اصلاً؟؟ هو احنا لو قلنا كلمة كريسماس اول حاجة حتيجي في مخك ايه؟؟؟

كل الي يسوع بيحبهم شمال!!!

لو لم يتجسد الله... لما تأله الأنسان... القديس أثناسيوس

التجسد هو الوسيلة الوحيدة لتحقيق إنسانية الإنسان...الأب رامي إلياس اليسوعي

 لأن الابن أراد أن يُرسل و أن يُلقب بابن الانسان حتى يجعلنا أبناءً لله، لقد تنازل لكي يرفع الذين سقطوا، لقد جُرح لكي يُعالج جروحنا، لقد خدم لكي يحرر هؤلاء الخدام إلى الحرية، لقد خضع للموت حتى يحتفظ بالخلود للأموات...القديس كبريانوس

طبعاً كلنا اتهرينا الكلام التالي : "المسيح بيحبنا و اتجسد عشان بيحبنا و .... إلخ"، بس احنا جتتنا نحست و زهنا و بقى بالنسبة لينا هري، اصل المشكلة اننا بنبص على الموضوع من النهاية، يعني ايه؟؟ يعني بنبص على الحدث بعد لما فهمنا ايه اللي حصل، خلونا نفكر قبل الحدث ما يحدث، يعني تخيلوا اننا يهود و المسيح لسه مولود حالاً، اليهود كانوا مستنيين "المسيح" او ببساطة ملك أو نبي أو ممكن نقول بالبلدي كده "البرنس بتاع الأنبياء" لكن مخطرش في ذهنهم خالص أن المسيح اللي هما مستنينه كان الله المتجسد،

الله خلقنا عشان يقرفنا و يكفرنا و ينكد علينا: مشكلة الألم

:مشكلة الألم

لن نجد دفاعاً في الكتاب المقدس كله عن الآلم و لا طلباً للألم و لا أستمتاعاً بالألم...الأب نادر ميشيل 

الألم حاجة صعبة أوي، لما بنشوف شاب/ شابه عندهم سرطان أو ماتوا و هم صغيرين، بنحس بضيق و غضب من ربنا -ده منطقي جداً- و دايماُ بنسأله ليه؟!!، و في الغالب ربنا "غامض و قامط" و مش بيرد علينا، ممكن نروح لحد نسأله "ليه ربنا عمل كده؟!!" ، و نلاقي اللي يقولنا حد "ده مرض الملكوت" أو "كده هو/ هي مستريح" ... إلخ من الردود و لما أنا بسمع الكلمتين دوله بيتشنج و بيجيله ارتفاع في ضغط الدم -انا مش بقول ان الكلام ده مش مفيد لكل الناس، ممكن يكون مفيد لبعض الناس، بس انا مش واحد من الناس ديه- ، أنا في النوت ديه مش ححاول اجاوب على مشكلة الألم لأن بصراحة مقتنع بكلام اللاهوتي الستر مجراث لما قال "فما من أحد لديه إجابه قاطعة على مشكلة الألم"، لما حد يبقى عنده سرطان لازم نحزن معاه و نبكي معاه و نقف جنبه مش نبررله، فيه أب كاثوليكي اسمه فرانسوا فاريون اليسوعي كان بيروح لشابه عندها 20 سنة و عندها سرطان لما قالتله أنا "بيتمرد" قالها " أنا بتمرد معاكي"، و لما حد بيفارق الحياة، ده بيسبب ألم و ضيق عند الناس اللي بتحبه و بيفتقدوه ، و من حقهم يعيطوا، لما اسمع ان فيه بنت حد اغتصبها لازم نثور و نضايق و نحزن، من الآخر على رأي الأب نادر ميشيل لما قال "فنحن نتحدث عن أشخاص متألمين يستوجبون الاحترام العميق لشخصهم و التقدير الكبير لمشاعرهم"، مينفعش نبرر الآلم و احنا قاعدين في التكيف، مينفعش نبرر الشر عشان بيحصل لحد غيرنا، من الآخر انا في المقالة القصيرة ديه انا مش ححاول اجاوب ليه فيه ألم؟،و لا ححاول ابرره، عشان الألم مش حاجة ينفع نبررهها، بس ححاول اطرح فكرة ازاي نقدر من الألم اللي "ملهوش معنى" و يعتبر حاجة "معفنه" نطلع "معني و قيمه"

المسيحي هو القادر على إضفاء معنى على ما لا معنى له... الأب فرانسوا فايون اليسوعي

جوهر فكر التجسد في المسيحية يتحدث عن الله المتعاطف مع آلامنا... اللاهوتي الستر ماجراث

صيام العذراء بين القديس الأنبا بيشوي و مولد سيدي العريان

مدد يا عريان مدد ... فيلم أمير الظلام

كلنا شفنا فيلم "امير الظلام"، في مشهد لما عادل امام و شله "بكابورتا" :) بيستحموا في النافورة اللي في صلاح سالم و هدومهم بتتسرق و بعدين و هما راجعين وجدوا الراجل اللي ماشي مع مراته و قالهم "انتم بلابيص "، بعدين عادل امام قاله "ده مولد سيدي العريان" راح الراجل قلع البنطلون و بعدين بقوا جماعة كبيرة من الناس "البلابيص" اللي بيحتفلوا بمولد سيدي العريان، بيروحوا ليوسف داوود "زلفى" و الراجل اياه قال لعادل امام أنا "شامم البركة يا كفرة" :) !!!!!!!

https://www.youtube.com/watch?v=HfhN8s5VfV4

فيه نقتطين لازم تأخذ بالك منهم

واحد: انه قلع هدومه علطول لما عادل امام قاله ده مولد سيدي العريان

أثنين: الراجل اياه قال تعبير غريب، قاله انا شامم البركة

قيامة المسيح أم قيامة حزلقوم

يعني ايه المسيح قام؟ لو أنا جيت و سألتَك /سألتِك يعني ايه المسيح قام أو يعني ايه اللي انت بتكتبه على الفيس و رسايل الموبايل "اخرستوس انستي... اليسوس انستي" :) أو لو واحد "برفكت" في الانجليزي

Christ is risen

الجواب غالبا حيكون "ايه" (ايموشن احمد شفيق)، ا"نا مبسوط انك سألت السؤال ده.. بس ثانية واحدة اجيب الشاحن من اسكندرية" (ايموشن حازم صلاح)،"الدرانك ميكونش درايفينج" (ايموشن رئيس الجمهورية محمد مرسي)، اللي انا متأكد منه أن معنى قيامة المسيح غايب عننا و غايب عني أنا شخصياً ، "ابسولوتلي" ايموشن الليمبي

نحن خلقنا الله على راحتنا بمزاجنا ... رابعة العدوية و صورتنا عن الله

ملحوظة هامة: انا لا اتكلم عن موضوع سياسي انا اتكلم عن صورتنا عن الله التي ظهرت و بانت في هذا االظرف السياسي فقط و هو فض اعتصام رابعة العدوية و ما تبعه من أعمال عنف

فلا يقدر الله إلا ما تقدر عليه المحبة، إذ ليس هو إلا محبة. و كل مرة نخرج فيها من دائرة المحبة. نُخطئ في الله و نضع إلهاً من الآلهة... الأب فرانسوا فاريون اليسوعي

:رابعة العدوية

من ساعة لما فضوا اعتصام رابعة و احنا طلعنا كل "البلاوي و الكلاكيع و الكره و ...." اللي فينا و "لطيناه" على الله، و طلعت آيات العهد القديم من سياقها، و اختفت ايات المحبة، و بقينا قاعدين ندعي على الأخوان صارخين قائين "خدهم يا رب، ربنا مش حيسيبهم و مش حيسيب حق الكنايس، خليهم يذوقوا من المرار اللي احنا حسيناه، احرقهم يا إلهنا " و فجأه بلا أي "اندهاش" اختفت أيات المحبة "السماء تفرح بخاطئ (أو بلغتنا الحالية اخواني) واحد يتوب، أكثر من تسعة و تسعون لا يحتاجون لتوبة (أو بلغتنا الحالية المستنيرين و العقلاء و المثقفون..)" و نسينا ان المسيح اتجسد عشان "الخروف الاخواني"، و "اختفت الصلاة اللي بنقولها في الأجبية:الذي لا يشاء موت الخاطئ (بلغتنا اخواني) مثلما يرجع و يحيا 

الخلاصة هناك قاعدة ارثوذكسية بتقول نحن نؤمن بما نصلي و نصلي بما نؤمن، خلونا نعيد تفكيرنا فيما نؤمن يه على ضوء صلواتنا

و عندما نقرأ أن الله غضب و سخط، فإننا لا يجب أن نفكر في أن هذه الإنفعالات بشرية [شريرة] بل يجب أن نفكر فيما يليق بالله الحر من كل هذه الأنفعالات أو بكلمات أخرى يجب ان نراها مثل القاضي الذي يحاكم و ينتقم من الأعمال الشريرة و يرد الشر على فاعليه ... القديس يوحنا كاسيان

الله المنتقم

بسكوت توتكو هل يحل أكله في الصيام؟

ذات مومنت لما تلاقي امك بتقولك "واد يا عماد، انت يا واد يا موكوس، قولي هتاكل ايه الاسبوع ده عشان الصيام الكبير بعد اسبوع

u feel like

"و لا أي اندهاش راحت عليك يا صيام"

تعريف الصيام القبطي

"هو فتره من الأيام تتراوح بين صيام "نونو" =40 يوم"،صيام"كبير = 55 يوم" او صيامات مختلفة:اربع و جمعه و عذرا و رسل... إلخ، هذه الفتره يتناول الاقباط الفول و الطعمية و الصوابع و ال"بابا"... إلخ و يطلبوا في الشغل "أكل صيامي" من "الشبراوي" أو من عربية الفول اللي تحت الشغل في الغالب بيبقى اسمها "الشيخ"، و تلاقي في اول الصيام الاهالي بتكلم بعض و تلاقيهم بيقولوا "كل سنه و انتم طيبين و بركة الصيام تكون معانا و الأخوان يغوروا في ستين داهية" ، و طبعاً مننساش ان يوم الاحد فيه حد لازم يوزع قربانه على الناس كلها و طبعاً لما تدخل السوبر ماركت او بنروح اي كشك لازم تلاقي "الكائن القبطي الصائم" بيبص في ظهر غلاف البسكوت احسن يكون فيه شرش لبن او مُصنع على خط قط صُنع عليه قبلاً منتجات اللبان أو قد يحتوي على آثار من مشتق الحليب !!!، و في آخر الصيام الناس بيجلها حالة ملل و بيقفشوا من الصيام و بيقولوا "و "القولون" بيبوظ خالص و بيستنوا الفطار بفارغ الصبر، قائلين هاتولي لحمة" و بيبدأ العيد ،و الصيام ده "حمادة" و العيد ده حماده تاني خالص، (انظراللينك رقم1) و لكن السؤال المهم احنا ليه بنصوم؟؟؟؟ "انا مبسوط ان انا سألت السؤال ده" (ايموشن حازم صلاح) هناك اجايات مختلفه غالباً هي إجابات من وعظات بتدافع عن الصوم او من كتيبات و فعلا اجابات مدهشة "أكثر منفريسكا" و هي